ثورة 25 يناير . . ثورة شعب . . ذكريات متفرقة

أرجع تاني للكتابه بعد توقف مرير جدا و مش عارف بسبب ايه . .

فوجئت زيي زي ناس كتير بموضوع الإيفنت اللي على الفاس . . مظاهرة في التحرير . . مطالب بسيطة . . الموضوع يوم 25 كان درامي
الناس بتتحرك بعفوية من غير قائد . .المظاهرات طلعت من كل مكان . . الشعب طلع . . مدن ما كانتش بتتحرك بدأت تتحرك . . فجأة الموضوع بقى بجد . . جمهورية التحرير . .

الموضوع كان عبارة عن حرب شوارع و حرب نفسية بينا و بين مؤسسة الرئاسه و الإعلام و الداخليه , إلخ . . . . .. ..

كل واحد بيقول ان المكسب معاه . . ضرب نار . . رصاص حي و مطاطي
أول مرة أشم الغاز المسيل للدموع يوم جمعة الغضب . . و أنا اللي كنت فاكره غاز عادي مش هيعمل حاجه . . و طول عمري أشوفه في انتفاضة فلسطين على التلفزيون وبس . .

أنا و أصحابي بنتابع الأخبار السياسية عن طريق النت . . فجأة النت قطع . .
نعمل ايه . . عليك و على الأرضي يا ابن بلدي . .

تلفونات طول الليل . . التلفزيون ما بيتغيرش عن الجزيرة و أخواتها . . مباشر و الوثائقية لما نزهق . .
النت رجع تاني . . فيديوهات و ارفع و شير . . كان أقوى من السلاح النووي . . ده سلاح أسقط منظومة فساد عن طريق الكيبورد . .
الحق . . المساجين هربت . . بلطجة . . سرقة . . قتل . . تصفية حسابات . . انزل لجان شعبية في كل الشوارع . .
الشرعية الشعبية رجعت . .

الرئيس السابق . . اللي هوا مش أبويا . . و لو هوا أبويا ملعون يا جدع . .
خطاب سخيف ورا التاني . . لغايت ما مناخيري وجعتني من كتر . . . . . . .

حسيت بطعم الحرية . . كنت ماشي في الشارع مش خايف من أي حاجه . .
الناس بتتحرك . . الضحكة رجعت . .

محاولات سخيفة لإنقاذ ما يمكن إنقاذه من شرعية الحكومة و الرئيس . .

الجيش نزل . . الشعب و الجيش إيد . . . . . يا ترا واحدة و لا كله بيدور على مصلحته

نمنا صحينا . . الجمال و الخيول مالية الميدان . . فكرتنا بفيلم الرسالة . . و عمر المختار . . و لورد أوف ذا رينجز ( ( رينجز ) )

جمعة الصمود . . جمعة الشهداء . . جمعة التنحي . . ايييييييييييييه . . تنحي مين . .
قرر رئيس مصر السيئ الرئيس محمد حسني مبارك تسليم السلطة للجيش . . احتفلات في مصر كلها . . (( ما عدا الناس اللي لسه شايفه ان مبارك ده أحسن حاجه حصلت للبلد بعد مينا موحد القطرين . . ) )

جمعة النصر . .
الميدان بيتنضف . .ثورة بيضاء . .قلوب صافية . . ناوية تغير في المجتمع . .

ايه اللي حصل عشان الفرقة اللي احنا فيها دلوقتي . . هيا دي الوعود اللي قلنا عليها في الميدان . . شعب مصر الكريم . . ارجعوا تاني لأخلاق التحرير . . روح الحب . . الهدف في بناء مصر بلد عظيم و كله على قلب رجل واحد .
.
أنت سلفي . . و ماله ده مش عيب . . ليبرالي . . مش كافر . . إخواني . . أهلا بيك . . قبطي . . أخواتنا . . انت مين في مصر . .

كله يفتكر و يسأل نفسه السؤال ده . . الإجابه عندكم جوا كل واحد فيكم

أنا خلصت

سلام

عسل أسود ! ! ممنوع دخول الفرافير ! !

عسل أسود ده مالهوش علاقه بالفيلم على قد ما الإسم فعلا جميل . . هتكلم النهادره على العسل اللي احنا عايشين فيه . . لزووووجه و تلزيييييق ( اععععععع ) . . مش عارف هيا ليه كل حاجه ماشيه بالقص و اللزق . . عمالين نقص و نلزق في كل حاجه في حياتنا . . بعضنا عايش في كدبه كبيره و مصدقها . . بايع القضيه و بيطلع يتكلم عن الوطنيه . . معارض على التلفزيون و بيتكلم عن المصداقيه . . و كله يقابل بعضه ( حبيب قلبي و الله لسه في سيرتك . . إلخ ) . . عندي طبع وحش ما أقدرش أتخلى عنه . . الوحش بقوله إنتا ابن ستين في سبعين . . ما أجاملوش . . و الكويس أنحنيلو . . لكن شغلانه القص و اللزق و انت و الله كويس بس ناقصك شويه تكنيك ( اللي عايز يعرف المعنى يسأل أي حد موسيقي ) . . الدنيا بقت عامله زي الغابه . . و تعالى بقى خد حقك . . الناس بقى عندها مبدأ سلامتي أولا . . ما حدش معبر أي حد . . طب سؤال و عايزلو إجابه . . هنتطور إزاي . . ها . . حد يرد عليا . . لما أبقى جبان بسكت على الغلط وأجامله عشان هوا معاه القوه . . و أجي على الضعيف عشان أكسب . . أفهم . . و الله يا مصر بقيتي أسود من العسل الأسود . . عندي أمل إن الناس هتتغير في يوم من الأيام . . يوم المحشر ( يا ساااااتر على الكآبه ) . . آه هوا ده اليوم الوحيد اللي كله هيقول الحق . . أصل دي فيها جنه و نار . . يمكن ما أكونش ساخر النهارده قوي . . بس عشان الموضوع فعلا ما يستحملش السخريه أكتر من كده . . تحياتي لأي واحد بيغير في البلد دي بطريقته . . و سلامي للعسل الأسود ( مصر في الحاضر ) و الوداع للعسل الأبيض ( مصر من زماااااان قوي ) . . اكيد هترجعيلنا تاني و أحسن من الأول . .

كلنا هنروح أمن الدوله ( هع هع هع هع هع )

في لحظه صفا مع نفسي . . قعدت أفكر و أبص للحيطان . . بدور فيها على الودان اللي طول عمرنا بنسمع عنها . . أبص ما ألاقيش إلا صمت غريب . . هيا الناس وشوشها بقت ملزقه كده ليه . . الكدب بقى علامه مميزه في كل خطاب في كل وقفه في كل تظاهره . . معظمهم بيعمل الحاجات دي لأسباب شخصيه ( أنا ماليش دعوه بيهم عشان نبقى واضحين ) . . فجأه كده صحيت على خبر غريب . . خالد مات . . مين خالد ده يا جدعان . . طبعا كلكم عرفتوا القصه بتاعته ( و اللي ما عرفش ده مش عايش معانا ) . . بعد حوار خالد أبص ألاقي شعب نايم نايم نايم ( حلال حلال حلال - الله يرحمه ) . . تقرير طبيب شرعي بيستهزأ بكل العقول المصريه . . شهاده ظباط تدل على إن الموضوع مترتب . . و مترتب قوي ( ربنا يجعل كلامنا خفيف عليهم ) . . أنا مش عايز الناس تعمل وقفه و لا تظاهره و لا أي حاجه . . أنا اللي عايزه إن الناس تفوق و توعى كده لحالها ( فيما لا يضر بمصالح الرئيس ) . . عايز أفهم حاجه صحيح . . هوا إحنا هنفضل كده في حالة الغباء دي كتير . . اللي يحرق الدم إن في ناس مصدقه إن الواد مات مختنق بلفافة البانجو ( أمال الناس اللي بتشربه مش بتموت ليه ؟؟؟؟؟؟؟؟؟؟؟ ) طب لما هوا مميت بالشكل ده . . الحكومه مش بتمنعه لييييييييييه . . أنا أحسن رأي سمعته في حوار البلد دي . . واحد عزيز على قلبي قال : أنا لو مسكت البلد دي همسكها تلات أيام بس . . أول يوم أعمل امتحان من 75% للأخلاق و كل اللي هينجح هيروحو الصحرا في مساكن مجهزه بأعلى مستويات . . تاني يوم قنبله هيدروجينيه هيروشيميه تسقط على البلد تنضفها من الغوغاء اللي عايشين فيها . . تالت يوم أرجع الناس النضيفه اللي في الصحرا و أقولهم ابنوا البلد على نضيف ( مش بالذمه ده واحد بيفهم ) . . أنا عن نفسي برجح إني بعد الرساله دي هتحط مع الناس اللي هتترمى عليهم القنبله . . بس عشان خاطري اللي هيروحوا الصحرا دول يعملولي شارع في أي عشوائيه باسمي . . شهيد الأخلاق الحميده ( و يلا بينا على أمن الدوله . . . لو طولت هناك اعرفوا انتي إترقيت هع هع هع هع )

ضمائر مالهاش صاحب ( عمليه ميتافيزيقيه )

طبعا العنوان ده يعني إن في كلام عملي ميتافيزيقي هيتقال . . خالص . . دي مجرد هبة حشيش طلعت مني النهارده قلت أكتبها . .
طبعا الطلبه اللي عايشه في الإامتحانات زيي ( أربع سنين و بدور على سنة تانيه ) عارفين معنى ان انت يبقى متوصى عليك في اللجنه . . يعني إن ورقة إجابتك مقدسه و إن مافيش مراقب يقدر يمد إيده عليها . . يعني تغش براحتك و لو قمت تاخد حاجه من اللي جنبك ( معلومه يعني ) ده مجرد مساعده للآخرين و المسلم لأخوه المسلم ( حتى لو ما كنتش مسلم ؛ و ده مش تحريض على العنصريه و الطائفيه و و و ............... إلخ ) . . يعني إن المراقب يزعق لكل اللجنه عشان يدوك الهدوء المطلوب في عمليه الغش . . خلي بقى طالب تاني يفكر إنه يعمل زيك بمبدأ إن اللجنه سايبه ( لولولولولولولوي ) يوم الفرح بتاع المراقب . . هتلاقي حرس الجامعه طابين عليك . . ورقتك بتتسحب . . محضر زي الفل تلبسه و انت بتضحك . . تشيل سنتين تلاته . . و لو حكمت طول عمرك تمتحن في الماده دي و مش هتنجح ( أعرف واحد اتجوز و خلف و لسه شايل ماده ) . . طاب سؤال ميتافيزيقي : هوا فين ضمير المراقب ؟ و لا هوا فيتامين واو ( الواسطه ) هوا اللي سائد دلوقتي . . أنا آخر ماده من كتر ما المراقبين فشلوا إن هما يسكتوني . . قالولي اتمشى في اللجنه و عيش حياتك و سحبوا الورق . .
طاب و بعدين هوا التعليم الحكومي هيفضل بالشكل الغريب ده . . سؤال إجابته موجوده في علم الغيب مش عند أي وزير . . و يا بلد متشقلبه ! !

طبق فول من عند عم إبراهيم ! !

إمبارح كنت سهران في الشارع مع 2 صحابي ( حجازي و عبده و ما حدش يقولي هما مين عشان انا بحكي موقف مش بحكي عن صحابي ) . . أخدنا الكلام لغايه الساعه 9 الصبح لقيت حجازي بيقول : ما تيجوا يا جماعه ناكل من عند عم إبراهيم ! مين عم إبراهيم ده . . ده صاحب عربيه فول . . توكلنا على الله و قلنا ماشي . . رحنا أكلنا من عنده طبق فول من أيام الفراعنه ( كنايه على انه قيافه ) . . بعدها الحساب كام يا عم إبراهيم . . الطبق بجنيه و نص . . طبعا دي كانت أول مره أكل من على عربيه فول بصراحه حاجه فخامه يعني . . طبعا حد هيقولي فين زيتونه الموضوع . . أقلك ( قصدي الحد اللي سأل اللي ما سألش ما يكملش قراءه ) . .
الناس اللي كانت واقفه معانا بتاكل من عند عم إبراهيم . . طلبه . . دكاتره . . و في ناس لابسه بدل شكلها كده يقول انهم ناس مهمه . . ربات بيوت . . كان في اتحاد رابطه المواطنين الغلابه . . مناظر الناس كانت كلها فيها لمحة ( مش باقي مني ) . .
حد هيسأل ( غير الحد الأولاني ) انته ليه بتقول كده . . هيا العمليه ناقصه اكتئاب . . و الله يا جماعه مش اكتئاب بس بدور على عزة نفس المصري و حبه لبلده . . مش لاقي . . كل الناس اللي جت أكلت لسان حالها بيقول ( حلوه لسان حاله دي ) و بعدين . . ايه اللي هيحصل فينا أكتر من كده . . عن نفسي أنا متوقع أيام سودا . . بس في الآخر بعد ما بصيت للوشوش . . ندهت طبق فول بالزيت الحار ياعم إبراهيم . .

يادي النيله على الميديا و اللي عايزينها

بقالي فتره بعافر مع الناس اللي المفروض اسمهم ميديا , مش عارف على أي أساس الإسم ده بس مش مشكله , المهم اتكلمت من حوالي كام سنه مع كام ممثل و سبحان الله على التناكه اللي هما فيها , مش عارف ده من ايه إن شاء الله ।
قلت ياعم فكك من الممثلين و روح على الشركات اللي بتدفعلهم , و ياريتني ما فكرت في كده , الشركات بتتعامل مع اللي مش داخل بواسطه على إنه حيوان اجتماعي مجب للشهره عنده شيزوفرينيا و لازم يروح العباسيه , (( هوا انت هتقارن نفسك بالناس ديانت اتهبلت ))
طاب و بعدين , قلت هيا السكه اللي هتمشي معاهم (( طاطي و صدرها )) و الحمدلله مصدرها بشكل متميز عن ناس كتير و ربنا يسهل و نوصل و أول ما أوصل أي حد جه عليا أو قفلني هطلع تلاته اتنين واحد **&^%^%%$$^%$#$#@&@#&$
حد هيسأل طاب و انت بتكتب الكلام ده ليه انت واحد منفسن , الرد هيكون دي المدونه بتاعتي أكتب اللي أنا عايزه و انت مال *&^%$^%$#$$@#^$@

و عذرا على الألفاظ الخارجه اللي استعملتها

أنا مين ؟ ؟

مدونه । । ههههههه । । مش مصدق । । ده تطور غريب و مش معروف إذا كان دي حاجه صحيه و لا لأ
طول عمري أسمع إن الناس بتاعت المدونات دي بتتمسك و بتتبهدل । । قلت أجرب । ।
المدونه دي هيا رحلة البحث عن الذات بتاعتي । । (( الكلام ده كبير و مجعلص ) ) । ।
أنا بفكر فيها بصوت عالي بس هوا أنا مين بجد ؟ ؟ هل أنا عبدالرحمن اللي اتربى تربيه إخوانيه في بلد سلفي । । و لا هل أنا بيدو اللي بيعرف يتعامل مع البنات و روحه حلوه । । و لا أنا بيدو اللي بيغني راب । ।
بدور في المدونه دي على حاجات تايهه مني في البلد دي । । قلت يلا بينا و ربنا يسهل على الكل । । بيدو على المدوناااااات । .